“Elke keer as julle van hierdie brood eet en uit die beker drink, verkondig julle die dood van die Here totdat Hy kom” (1 Kor.11:26). Hierdie woorde staan in die Bybel in 1 Korintiërs 11. Elkeen wat die brief al gelees het, het op hierdie woorde afgekom. Hierdie woorde kom ook in die Nagmaalformulier voor. Elke gelowige wat gereeld nagmaal gebruik, hoor hierdie woorde dus vier keer ‘n jaar. Die kernvers vir vanoggend se preek, is daarom eintlik bekende woorde. Kom ons maak vanoggend seker dat ons weet wat die vers beteken.

Hierdie woorde is in werklikheid ‘n geloofsbelydenis.

Tema: Met nagmaal bely ek my geloof in Jesus Christus wat vir my aan die kruis gesterf het

1. My geloof dat Christus het vir my gesterf het, is baie sterk en baie diep

Wanneer ek nagmaal toe kom, op staan en na die tafel toe kom en die brood eet en die wyn drink, verkondig ek die dood van Jesus Christus totdat Hy kom. Nagmaal het alles te doen met Jesus Christus wat aan die kruis gesterf het.

• Wanneer ek nagmaal toe kom, kom ek omdat ek in Christus glo. Nagmaal mag nie ‘n gewoonte wees nie. Nagmaal moet elke keer ‘n diep geloofsaak by my wees. Nagmaal is net bedoel vir die persoon met ‘n ware geloof in Jesus Christus. Ek kom nagmaal toe, omdat ek hierdie ware geloof in Christus het. Ek het hierdie geloof in Christus van die Heilige Gees af gekry. Hy het die geloof deur die Woord van God in my hart gewerk. Met hierdie geloof in my mag ek nagmaal gebruik.
• Ek kom verder nagmaal toe, omdat ek glo dat Jesus Christus vir my aan die kruis gesterf het. Die brood en wyn wys na Jesus se liggaam en bloed aan die kruis op Golgota. Daar het Hy sy lewe gegee om sondaarmense van sonde, van die duiwel se mag en van die ewige dood te verlos. Dit is ek wat die brood eet en die wyn drink. Die brood en wyn is vir my bedoel. Die brood wat ek eet en die wyn wat ek drink, wys dat Christus vir my gesterf het. Ek gebruik nagmaal met die geloof dat Jesus Christus sy lewe vir my gegee het om my te verlos.
• My geloof in Christus is baie sterk en baie diep. Ons land is anders. In ons land is geloof in Jesus Christus nie meer sterk nie. Jesus word vir dekades reeds in ons land openlik nie meer as die enigste verlosser gesien nie. Ek leef in hierdie land. Met nagmaal het ek die baie belangrike roeping om Jesus Christus se dood te verkondig. Ek mag nagmaal, nie uit gewoonte gebruik nie. In my gedagtes en my hart moet ek seker wees dat ek nagmaal gebruik, omdat my geloof in Jesus Christus baie sterk en baie diep is.

Wanneer mens so oor die nagmaal dink, besef jy dat nagmaal ‘n baie diep geestelike saak is en net bedoel is vir die mens met ‘n ware geloof in Jesus Christus, ‘n geloof wat baie sterk en baie diep is.

2. Ek weerhou my daarvan om nagmaal oppervlakkig en verkeerd te gebruik

Die gemeente in Korinte het ook nagmaal gebruik. Nagmaal moes vir hulle ook ‘n baie diep geestelike saak gewees het. Maar….daar het baie verkeerde dinge gebeur, wanneer die destydse gelowiges in Korinte nagmaal gebruik het.

Hulle was ‘n verdeelde gemeente en het nie ‘n hegte verhouding met mekaar gehad nie. ‘n Goeie voorbeeld hiervan was dat hulle destyds kos en wyn van die huis af gebring het. Hulle het met nagmaal saam geëet. Almal kon nie op dieselfde tyd by die nagmaal wees nie, want party moes werk. Hulle het nie ‘n keuse gehad nie. Die lidmate wat vroeër by die nagmaal kon wees, het nie vir die ander gewag nie, maar begin eet en drink. Wanneer die lidmate wat later eers kon kom, by die nagmaal opdaag, was daar niks meer om te eet nie en sommige van die lidmate wat vroeër gekom het, was al onder die invloed van drank.

Dit het in die gemeente gebeur, want die lidmate het nie eerbied vir God en vir sy gemeente gehad nie. Nagmaal in Korinte het in ‘n oppervlakkige eet en drink verander. Dit was sonde.

Wanneer ‘n gemeente so nagmaal gebruik, doen dit eerder kwaad as goed. Dit was destyds in Korinte so. Wanneer ‘n gemeente op ‘n oppervlakkige verkeerde manier nagmaal gebruik, sal dit vandag steeds eerder kwaad as goed doen.

Ek wat met geloof in Christus nagmaal toe kom, moet my daarvan weerhou om nagmaal oppervlakkig en verkeerd te gebruik. Twee voorbeelde hiervan is: Ek moet my daarvan weerhou om my horlosie ongeduldig dop te hou wanneer dit nagmaal is, omdat ek nie daarvan hou as ‘n erediens te lank is nie. Ek moet my ook daarvan weerhou om soveel ander dinge op die Sondag wanneer dit nagmaal is, te reël, dat ek nie kan wag dat nagmaal klaar moet maak en ek weer by die huis kan wees nie.

Hoe kry ‘n mens dit reg om nagmaal reg te gebruik? Wanneer jy deur die Heilige Gees jou goed voorberei het vir nagmaal en wanneer jy nagmaal toe kom met ‘n opregte geloof in Jesus Christus kom jy met die regte gesindheid en sal jy nagmaal op die regte manier kan vier.

3. My gebruik van nagmaal is my geloofsbelydenis in die gekruisigde Christus

Die woorde in die kernvers vir vanoggend se preek wys vir ons dat ‘n mens nie net nagmaal toe kom om te kom ontvang nie. Met elke nagmaal het ek ook ‘n baie belangrike werk om te doen. Met nagmaal verkondig ek die dood van Jesus Christus.

Die woord verkondig beteken ook bely. Met nagmaal bely ek dus my geloof in Jesus Christus. Ek mag daarom net nagmaal gebruik, met ‘n opregte geloof in my hart.

• Nagmaal is alleen vir die persoon met ware geloof in Jesus Christus. Met nagmaal bely ek dat ek in Jesus Christus glo.
• Ek mag nagmaal gebruik, indien ek ‘n lewende verhouding met Jesus Christus het, wat vir my gesterf het. Met nagmaal bely ek dat Jesus vir my aan die kruis gesterf het.
• Ek bely my geloof met nagmaal, want my geloof in Christus is baie diep en baie sterk. Ek kom na die nagmaaldiens toe, ek staan uit my sitplek op en kom sit aan die tafel, ek neem die brood en die wyn, want my geloof in Jesus Christus is baie diep en baie sterk, maar ek het nodig dat Die Heilige Gees my geloof in Christus nog sterker en nog dieper maak.

Is jou geloof in Christus baie sterk en baie diep?

Is jy vanoggend bereid om met jou gebruik van nagmaal jou geloof dat Christus vir jou gesterf het, te bely?

As jy “ja” op hierdie vrae kan antwoord, dan is hierdie nagmaal vir jou bedoel.