ONTMOETING
Votum: Ps.121:1,2
Seën: Genade en vrede vir julle van Hom wat is en wat was en wat kom; en van die sewe Geeste voor sy troon; en van Jesus Christus, die getroue Getuie, die Eerste wat uit die dood opgestaan het; en die Heerser oor die konings van die aarde.
Lof aan God: Ps.98:1,2
Geloofsbelydenis: Twaalf Artikels
Sing: Skb.12-3:1,2

VEROOTMOEDIGING
Die Wet: Eksodus 20/Sondag 34
Antwoord op die Wet: Ps.65:2
Gebed

VERKONDIGING
Sing: Ps.119:1,7
Lees: Matteus 11:25-30
Kernverse: Mt.11:28
Tema: “Kom na My toe”
Sang: Ps.98:1,2; Skb.12-3:1,2; Ps.65:2; Ps.119:1,7; Ps.145:9; (Tafel) Ps.84:1,2,3,4,6; Ps.59:1,5,10.

Inleiding:

Verlede Sondag met ons voorbereidingdiens het ons uit Ps.15 voor die vraag te staan gekom: Mag ek nagmaal toe kom? Ons het ook by die antwoord uitgekom: Ja, ek mag kom, maar net met Christus.

Met vanoggend se nagmaal is ons by Jesus Christus se woorde in Mt.11:28: “Kom na My toe almal wat uitgeput en oorlaai is” (83 vert) / “Kom na My toe almal wat vermoeid en belas is” (53 vert) “en Ek sal julle rus gee”.

Ons staan voor ons Verlosser se woorde: “Kom na My toe”. Dit is ook die tema van vanoggend se preek.

Tema: “Kom na My toe”

1. Jesus, God se Seun, is aan die Woord.

Matteus en Lukas het deur die Heilige Gees hierdie woorde van Christus neergeskryf. In Matteus lees ons “Daardie tyd” (Mt.11:25). Uit Lukas weet ons meer van “daardie tyd” (Lk.10:17-22).

Jesus was klaar met sy werk in Galilea in die noorde van die land. Hy en sy dissipels en baie mense wat Hom gevolg het, was op pad na Jerusalem in die suide. Terwyl hulle deur Samaria gegaan het, het Jesus sewentig dissipels gestuur van die koninkryk van God te gaan getuig.

Toe die sewentig teruggekeer het, het Jesus met hulle en almal daar by Hom gepraat. Om sy woorde reg te verstaan, is dit nodig om vs 27 reg te verstaan: “My Vader het alles aan My toevertrou, en niemand ken die Seun nie, behalwe die Vader; en ook ken niemand die Vader nie, behalwe die Seun en elkeen aan wie die Seun Hom bekend wil maak”.

Vir vanoggend se boodskap is die volgende in vs 27 belangrik:

• Jesus, God se Seun is aan die woord. Hy, die Seun ken die Vader. Hy en die Vader is van ewigheid af een. Hy ken die Vader se ewige besluite oor alles en almal. Hy het juis gekom om God die Vader se besluit oor verlossing van sondaars bekend te maak.
• Sy Vader het alles aan Hom toevertrou. Jesus se Vader het die verlossing van sondaars aan Hom toevertrou (Mt.9:13). Sy Vader het die mag oor lewe (Mt.9:22) en dood (Mt.9:25) aan sy Seun toevertrou.

Ons kan sê Jesus Christus, Seun van God het vanuit ‘n posisie van mag destyds met die mense by Hom gepraat.

Ons is vanoggend met nagmaal ook by Jesus Christus. Hy is deur sy Heilige Gees hier teenwoordig. Hy is na sy kruisiging en opstanding die Seun van God wat alle mag in die hemel en op aarde van sy Vader ontvang het.

Sy woorde was destyds vir almal wat aan Hom behoort. Sy woorde is ewige woorde ook vir almal wat aan Hom behoort vandag.

2. Sy uitnodiging is ‘n ernstige opdrag.

“Kom na My toe, almal wat uitgeput en oorlaai is, en Ek sal julle rus gee”.

Hierdie woorde kan mens in drie belangrike dele opbreek om die volle betekenis te verstaan en te glo.

Die eerste deel: “Kom na My toe”. Die Seun van God, praat met nietige sondaarmense in ‘n sondige wêreld – destyds en vandag steeds. Die Seun van God nooi ons uit. Sy uitnodiging is in werklikheid ‘n ernstige opdrag: Kom hier. Kom nader.

Jesus Christus, God se Seun ons Verlosser, wil hê ek moet na Hom toe kom. Hy wil my by Hom hê.

Hoe kom ek na Jesus Christus toe?
Hoe kry ek dit reg om naby Hom te wees?

As mens is Jesus in die hemel aan die regterhand van sy Vader. Sy godheid is een met sy mensheid en is ook in die hemel by sy Vader. Na sy godheid is Jesus, God se Seun ook op die aarde.

Ek kan dus geestelik hier op aarde na Hom toe kom. Ek kan geestelik by Hom wees. Trouens, ek kan hier op aarde geestelik so naby Christus wees, dat ek een met Hom is. Om na Christus toe te kom, is om deur die Heilige Gees na Hom toe te kom en by Hom te wees.

Ek kom deur die Heilige Gees na Jesus toe wanneer ek met my hele hart in Hom glo. Ek glo in Hom, want ek weet met vaste sekerheid dat Hy, God se Seun die enigste Redder is en dat Hy gekom het om my te red.

Ek is by Hom, wanneer ek Hom met my lewe vertrou. Dit is wanneer ek die vaste vertroue het, die seker oortuiging het, dat Jesus Christus alles is en het wat ek nodig het om te kan lewe, hier op aarde en in die hemel hierna.

3. In die lewe op aarde is daar baie onrus.

Die tweede deel van Jesus se woorde – “almal wat uitgeput en oorlaai is”.

Wie is hierdie mense wat uitgeput en oorlaai is?

Destyds –

• Die gewone Jode, mans en vroue, kinders en ou mense wat destyds al die godsdienstige reëls en wette wat die skrifgeleerdes en Fariseërs op hulle gelaai het, moes nakom. Hulle het gedurig gehoor hulle is nie goed genoeg om gered te word nie, daarom het hulle bekend gestaan as sondaars.
• Hulle omstandighede as kinders en erfgename in die genadeverbond, was baie moeilik. Hulle het in die land wat God aan hulle beloof het, gebly en gewerk, maar onder die heidense Romeinse regering geleef.
• Dan was daar gedurigdeur baie siek mense, mense wat verlam en gebreklik was wat gesukkel het. Die man by die bad van Betesda was byvoorbeeld agt en dertig jaar verlam.

Vandag – Wat is die dinge wat vandag veroorsaak dat ek uitgeput en oorlaai is?

• Die wete dat ek nie goed genoeg vir God is nie, al probeer ek hoe hard. Dit gebeur wanneer ek dink dat ek reg genoeg moet lewe, dan sal God my vergewe. Om al die reëls en pligte te probeer nakom, terwyl ek nie kan nie, is ‘n swaar las.
• Sonde wat ek nie kan los nie en my gewete wat my aanhoudend pla. Wanneer ek my kom kry, het ek weer gesondig. Hierdie skuldgevoel en stryd in my, maak my lewe baie swaar. My sonde is ‘n las wat ek alleen dra.
• Die sonde in die land. Die sonde van die regering van die dag waardeur die land afgebreek word en die sonde van doodmaak en steel deur soveel misdadigers laat my en baie ander swaar kry.
• Ander moeilike omstandighede soos siekte, teleurstelling, hartseer, onsteltenis en ander ernstige probleme is alles dinge wat veroorsaak dat ek uitgeput en oorlaai is.

Ek is ‘n gelowige, maar my lewe is onrustig. Ek leef in ‘n onrustige land. Ek leef met ‘n onrustige hart en onrustige gedagtes oor soveel dinge in die land en in my eie lewe. Ek is ook een van die mense wat uitgeput en oorlaai is.

4. God se Seun gee vrede en lewe.

Die derde deel – “en Ek sal julle rus gee”.

God die Vader het uit liefde sy Seun gegee. Jesus Christus. die Seun van God het uit liefde sy lewe gegee. Hierdie woorde van Hom “en Ek sal julle rus gee”, is woorde van liefde.Dit is in werklikheid ‘n belofte uit liefde.

Wanneer ek na Jesus Christus toe kom, sal ek rus by Hom kry. Hoe moet ons die rus wat God se Seun gee, verstaan?

• Rus van die las van reg lewe om goed genoeg vir God te probeer wees. Ek sal uit my eie nooit goed genoeg voor God kan leef nie. Maar sy Seun is goed genoeg vir Hom. Sy Seun is ewige ware God en volmaakte mens sonder sonde. Hy het my sonde op Hom geneem. Hy het vir my aan die kruis gesterf en vir my uit die dood opgestaan. Deur sy dood en opstanding het Hy vir my verlossing, vergifnis en vryspraak by God die Vader verdien. Ek hoef nie op my eie goed genoeg te probeer wees om gered te word nie. Jesus is my Redder. My geloof in Hom, red my van alle straf en oordeel.
• Rus van sonde. Deur sy dood en opstanding het Christus die mag van sonde gebreek. Hy het my onder sy heerskappy gebring en my nuut gemaak. Sonde het nie meer mag oor my nie en heers nie meer oor my nie. Met die Gees van Christus in my, kan ek met sonde breek en daarteen veg.
• As verloste gelowige is my lewe vir Christus en my diens aan Hom nie meer ‘n moet en ‘n swaar plig nie. Ek moet kerk toe gaan het verander in ek wil kerk toe gaan vir my afspraak met God. Ek moet Bybel lees het verander in ek wil graag die Bybel oopmaak en hoor wat my God vir my sê.
• Ek kry rus by Christus in die wete dat Hy die Hoof van sy kerk is en die Hoof van die ganse skepping. Al gaan soveel dinge so verkeerd in ons land, leef ons steeds onder Christus se liefde en sy sorg.
• Ek kry rus by Christus want ek weet ek is by Hom en daarom nooit sonder Hom nie. Hy het ter wille van my alleen aan die kruis gehang, sodat ek nooit alleen sal wees wanneer dit baie swaar gaan nie. Ek is altyd naby my Here en my God, Jesus Christus, God se Seun.

Ons hoor Christrus se liefde in sy woorde: “Kom na My toe, almal wat uitgeput en oorlaai is, en Ek sal julle rus gee”.

Ons sien vanoggend sy liefde in die brood en wyn met nagmaal –

• Die brood en wyn wys dat Christus ons met sy lewe liefgehad het.
• Die brood en wyn wys verder dat ons by Christus, naby Hom is. Trouens, ons is so naby dat ons deur ons geloof een met Hom is.
• Met hierdie waarheid dat ons een met Christus is, maak die Heilige Gees ons sterk vir  hierdie sondige en stukkende lewe.

Nagmaalformulier
Sing voor tafel: Ps.145:9
Sing aan tafel: Ps.84:1,2,3,4,6
Voltooiing van die nagmaalformulier

ANTWOORD
Liefdegawe vir barmhartigheid
Sing: Ps.59:1,5,10
Seën: Die Here sal julle seën en julle beskerm; die Here sal tot julle redding verskyn en julle genadig wees; die Here sal julle gebede verhoor en aan julle vrede gee.
Amen.