ONTMOETING
Votum: Ps.124:8
Seën: Genade, barmhartigheid en vrede vir julle van God ons Vader en Jesus Christus ons Here, deur die werk van die Heilige Gees
Lof aan God: Ps.105:1,2
Geloofsbelydenis: Twaalf Artikels
Sing: Ps.9:1,7,10

VEROOTMOEDIGING
Die Wet: Levitkus 19:1-18
Antwoord op die Wet: Ps.105:3
Gebed

VERKONDIGING
Sing: Skb.8-12:1,2
Lees: Hebreërs 4:14-16; Johannes 14:1-3; 16,17 en Sondag 18.
Kernverse: Hebr.4:14-16
Tema: Christus se hemelvaart beteken genade en seën vir elkeen wat glo.
Sang: Ps. Ps.105:1,2; Ps.9:1,7,10; Ps.105:3; Skb.8-1:1,2; Ps.47:1,4; Skb.18-1:4,6

Inleiding:

Christus se hemelvaart is ‘n belangrike deel van die geloof waardeur ons gered word. Alles wat Christus gedoen het, het Hy vir ons gedoen, daarom is sy hemelvaart baie belangrik. Vanoggend kyk ons na Christus se hemelvaart en wat dit vir ons beteken.

Tema: Christus se hemelvaart beteken genade en seën vir elkeen wat glo.

1. Ons het baie sterk getuies van Christus se hemelvaart.

Christus se hemelvaart is ‘n werklikheid wat regtig gebeur het. Ons is in 2024 seker dat Jesus Christus na die hemel opgevaar, omdat ons baie sterk getuies daarvan het. Ons het die volgende getuies voor ons –

• Jesus het die aand voor sy kruisiging baie lank en baie ernstig met sy dissipels gepraat. In Joh.14:3 het ons van Jesus se eie woorde: “En as Ek gegaan het en vir julle plek gereed gemaak het, kom Ek terug en sal julle na My toe neem, sodat julle ook kan wees waar Ek is”. In hierdie vers het ons Jesus Christus, die Seun van die lewende God, aan die woord. Hy het self gesê dat Hy na die hermel gaan opvaar om in sy Vader se hemelse woning plek vir sy gelowiges gereed te maak. Die eerste getuie wat ons het, is Jesus Christus self. Hy het oor sy eie hemelvaart getuig. Hy is die Seun van God en dus self God, daarom is sy woorde volmaak waar.
• Die tweede getuie is die skrywer van die brief aan die Hebreërs. Ons weet nie wie die skrywer presies was nie. Ons weet wel hy was ‘n gelowige wat deur die Heilige Gees gelei is om die brief te skryf. Die Heilige Gees het die skrywers van die Bybelboeke geïnspireer om die woorde wat van God af kom neer te skryf. Die woorde in die brief aan die Hebreërs klink so: “Terwyl ons dan nou ‘n groot Hoëpriester het, wat reeds deur die hemele gegaan het, Jesus die Seun van God, laat ons vashou aan die geloof wat ons bely” (Hebr.4:14). Die tweede getuie wat ons het, is die skrywer van die Hebreërbrief wat deur die Heilige Gees van Christus se hemelvaart getuig het.
• Die derde getuie lees ons van in die Heidelbergse Kategismus. Ons bely in die Kategismus die volgende woorde: “Christus is voor die oë van sy dissipels van die aarde af na die hemel opgeneem” (HK 18, V&A 46). Die Kategismus kry daardie woorde in Ha.1:9. Jesus se dissipels is die derde getuie, eintlik die derde groep getuies dat Christus na die hemel opgevaar het.

Op grond van al hierdie baie sterk getuies dat Jesus Christus na die hemel opgevaar het, glo ons dit met ons hele hart. Ons bely ons geloof in Christus wat na die hemel opgevaar het, openlik. Die Heidelbergse Kategismus is deel van ons geloofsbelydenis.

2. In sy almag is Christus in die hemel en op die aarde.

Die dissipels het Jesus voor hulle oë na die hemel gesien opvaar. Christus is met liggaam en siel in die hemel opgeneem.

Dat Christus in die hemel is, bring ‘n gelowige by een van die laaste beloftes van die Here Jesus aan sy dissipels en ook aan al sy gelowiges. Na sy opstanding het Jesus die volgtende belofte gemaak: “En onthou: Ek is by julle al die dae tot die voleinding van die wêreld” (Mt.28:20).

Die vraag om te antwoord, is: “Is Christus dan nie by ons tot die einde van die wêreld soos Hy beloof het nie?” (HK 18, V&A 47).

Die antwoord op die vraag in Sondag 18 gaan oor Christus se almag. Hy is ware mens en ware God tegelyk. Hy is almagtig. Wat sy menslike natuur betref is Christus nie meer op die aarde nie. Hy het na die hemel opgevaar. Maar as God, is Christus én in die hemel én op die aarde.

Dit beteken dat Christus steeds God en mens tegelyk is. Dit is belangrik dat Hy ware God en ware mens sal bly, want alleen as God enmens tegelyk, is Hy ons Verlosser.

Christus se  Godheid is een met sy mensheid in die hemel, maar sy Godheid kan nie ingeperk word nie en is ook by ons op die aarde.

Hierdie belydenis is ook ‘n belangrike deel van die geloof waardeur ons gered word. Elkeen van ons het nodig om geloofsekerheid hieroor te hê: Christus is as mens in die hemel en nie meer op aarde nie. Hy is as God in die hemel by sy Vader aan sy Vader se regterhand en by ons op die aarde.

Jesus Christus het ‘n belofte gemaak dat Hy by sy gelowiges, by ons sal bly tot die voleinding van die wêreld. Hy is volmaak getrou. Hy hou sy belofte. Ons het Jesus Christus oral en altyd by ons. Dit is wonderlike genade!

3. Ons kry wonderlike geestelike seën deur Christus se hemelvaart.

Jesus Christus het vir ons na die hemel opgevaar. Die laaste vraag in Sondag 18 is: “Watter nut het die hemelvaart van Christus vir ons?” (HK 18, V 49). Die antwoord op die vraag kan ons so saamvat: Ons kry wonderlike geestelike seën deur Christus se hemelvaart.

Die geestelike seën is die volgende –

• Christus is ons Voorspraak by die Vader. Voorspraak beteken Hy is ons Hoëpriester wat vir ons bid. Jesus was ‘n mens soos ons. Hy het hierdie stukkende wêreld beleef net soos elkeen van ons (Hebr.4:15). Hy is aan alles onderwerp wat ‘n mens op aarde kan beleef. Wanneer ons Jesus Christus se lewe op aarde in die evangelies lees, sien ons alles wat Hy beleef het en verduur het. Een groot verskil tussen Jesus en alle ander mense is: Hy het nie gesondig nie. Omdat Christus ons ken en alles wat ons deurmaak, het Hy medelye met ons en al ons swakhede. Hy het ons so liefgehad dat Hy sy lewe vir ons gegee het. Hy het ons steeds lief. Hy tree vir ons in by sy Vader. Hy bid vir ons. Hy bid op grond van sy dood aan die kruis en sy opstanding dat sy Vader ons altyd sal vergewe. Dit is wonderlike genade! Jesus Christus noem ons name vir sy Vader in die hemel. Omdat Christus vir ons bid, kan ons hier op aarde in gebed altyd na God toe gaan om by Hom genade te kry (Hebr.4:16).
• Christus is as mens in die hemel. Hy is ons Hoof en ons is sy liggaam. Deur ons geloof is ons een met Hom. Hierdie eenwees met Christus is vir ewig. Almal wat in Christus glo, sal ook in die hemel opgeneem word. Hyself is ons waarborg. Waarborg beteken ons het volmaakte, vaste, ewige sekerheid.
  Terwyl ek, Christengelowige nou hier op aarde leef, leef ek met hierdie vaste sekerheid dat ek na hierdie lewe op aarde in die hemel sal wees. Ek sal daar wees, want Christus is daar. Ek kan en moet met hierdie sekerheid leef, want die Heilige Gees gee vir my hierdie geloofsekerheid.
• Na Christus se hemelvaart het Hy sy Vader gevra. Hy en sy Vader het die Heilige Gees na ons toe gestuur. Die Gees het na ons toe gekom as ons waarborg. Hy is ons waarborg dat ons nie vasgevang sal bly in hierdie aardse lewe nie, maar dat ons in Christus sal bly glo.
  Die Gees is ons waarborg dat ons vir die Here Jesus sal leef en nie vir die hier en die nou nie. Elke gelowige kan daarom seker wees dat my lewe nie nutteloos, sonder betekenis is nie. Ek is Jesus Christus s’n. Ek is verlos. Ek het die ewige lewe. Ek leef in die koninkryk van die hemel. Ek leef soos ‘n verloste gelowige wat oppad is na ons Vader se hemelse woning waar ek saam met al die ander Christengelowiges tuis sal wees tot in lengte van dae.

Jesus Christus se hemelvaart was ‘n almagtige gebeurtenis wat vir elkeen wat in Hom glo, wonderlike geestelike seën beteken. Bid dan die Heilige Gees dat Hy elkeen sal help en lei om te besef en te glo dat ook Christus se hemelvaart ‘n baie belangrike deel van ons verlossing is.

ANTWOORD
Sing: Ps.47:1,4
Gebed
Liefdegawe vir barmhartigheid
Sing: Skb.18-1:4,6
Seën: Die genade van ons Here Jesus Christus, die liefde van God ons Vader en die gemeenskap van die Heilige Gees sal met julle almal wees.
Amen